Pro 6 | ZomZIV | STEP | Ka tapa aw, na vengpa tangin mawhlawh tawi dingin na om a, midang khat tangin kiciamna khut beng-a

Proverbs 6

Haina Thu Vauhilhna

1 Ka tapa aw, na vengpa tangin mawhlawh tawi dingin na om a, ^a
midang khat tangin kiciamna khut beng-a
2 na kampausa ah awkin,
na kampaute in hong mat leh
3 tua ciangin ka tapa aw,
na vengpa khut sung tungkhin na hi manin, na suahtak na’ngin:
Pai-in nang mahmah kiniamkhiat in;
na vengpa tungah thum tentan in.
4 Lusu kei inla
ihmu kha kei in.
5 Sabengpa khut panin suakta sanang bang, ^b
thangsiahpa’ thang pana suakta vasa bangin, nang le nang kisuahtak in. ^c
6 Thadahpa aw, miksi kiangah pai-in
a nuntakzia ngaihsunin pil in! ^d
7 Tua in makaipa,
a cingpa ahikeh a ukpa nei lo hi;
8 tua hi napi anlak hunin an kaikhawm a,
khuakhal lai-in an a khol hi. ^e
9 Nang thadahpa aw, bang tanvei lum lai ding na hiam? ^f
Na lupna pan cik ciangin tho ding na hi hiam?
10 Tomkha ihmut sung, tomkha mengmet sungin,
tomkha khut zepa khawl sungin - ^g
11 misuampa bangin zawnna hong tung dinga,
galhiam tawipa ^{▼▼6.11 Ahikeh mi vakvaite bang / khutdawh ngen} bangin taksapna in hong pha ding hi. ⁱ
12 Misia, mi tatkhelpa
zuauphuakin vak kawikawi a,
13 a mit phoisakin
a kheginin lak a,
a khutmete tangsakin ^j
14 a lungsim ah khem a sawmsimpa -
amah in kitotna piangsak den hi. ^k
15 Tua ahi manin siatna in bing phak dinga, ^l
a kibawlpha thei lo dingin thakhatin a kisia ding hi. ^m
16 TOPA in a muhdah na guk om a,
kihuai a sak na sagih om hi,
17 tuate in: Kihihsakna mit, ⁿ
a zuauthei leii, ^o
mawhpeng sisan a luangsak khut, ^p
18 gitloh a sawm lungtang,
gitloh hih dinga kinawh khete, ^q
19 zuauthu gen-a teci pangte le ^r
sanggamte laka mi helhotpa ahi hi. ^s

Angkawmna Thu Vauhilhna

20 Ka tapa aw, na pa thupiakte zui inla, ^t
na nu hong hilhte nawlkhin kei in.
21 Na lungtang ah khihden inla,
na ngawng kimkot ah gakden in. ^u
22 Na paina peuh ah hong pi-in,
na ihmut ciangin hong vil dinga;
na khanlawh ciangin hong hopih ding hi.
23 Hih thupiakte meivak hi-a,
hih hilhna khuavak hi-in,
kipuahphat nadinga kisekna in
nuntakna lampi hi-in, ^v
24 numei zuautatte panin nang hong kem dinga,
uklah zi’ kamkhum panin nang hong kem ding hi. ^w
25 Ama melhoihna iplah kei inla,
hong zawlmitna khenglah kei in;
26 ahang in, numei kizuaknu in anlum khat zahin na man kiamsak dinga,
angkawmnu in na nuntakna mahmah a sialnek ding hi. ^x
27 Mi khat in a puan kangsak loin
mei-am pom thei ding ahi hiam?
28 Mi khat in a khe kangdulhsak loin
meiholsa tungah pai thei ding ahi hiam?
29 Midang khat zi a luppihpa tua tawh a kibang hi-a;
tuanu a lawngkha peuhmah in dan tuak loin a om kei ding hi.
30 A puksi dektak gutapa in a gilpi puah nading a guk leh
tua gutapa a kisimmawh kei hi.
31 Tua hi napi amah a kimat leh a inn-a a neihsa teng a bei zongin
a zah sagih in a loh pelmawh ding ahi hi. ^y
32 Ahi hangin angkawmpa in thukhentelna a thei lo hi-a,
tua banga gamta mi amah le amah kisusia ahi hi.
33 Ama lawhtak vuakna le minsiatna hi-a,
a maizumna a veng ngei kei ding hi; ^z
34 ahang in, hazatna in pisalsa khat hehna khangsak a, ^aa
a phu a lak ciangin a lainat kei ding hi.
35 Amah in a tanga sum piak sang loin,
golhsum tampitak a piak hangin a nolh ding hi.